الموشية العتيقة في حلب .. مركز الكون (كتبها عبد الكريم بيبي)
ألموشية العتيقة…قلب البلد …فشختين بتصير بباب الفرج يعني بالبرية..وفركة كعب بتصير بالنيال…واذا اتسحولت على مهيلاتك بتلاقي حالك بالحديقة العامة…واذا درخشت من طرف العبارة صرت بشارع بارون…
خيو لاتتحرك من أرضك أنت بأول التلل..!! هلق الموشية العتيقة يعني شريان حلب…يعني الباصات بتحطك بنص حارتك وبفرنك أو فرنك ونص أو فرنكين ولأنو أمة لا إلة إلا الله يوميا بنص البلد
والناس بعد ماتخلص شغلا أو دورتا أو حومانا مالا إلا تاخود الباص من الموشية العتيقة…بس بلشت تشم ريحة البن المحمص وريحة الهال يعني أنت بالموشية العتيقة..!!!
أشهر وأروع وأطيب بياع بن بحلب ومفصولة ومن الإيخر وبدون مناقشة “بونجة” واللي بيعرف يشرح للما بيعرف والشغلة التانية اللي كانت تميز الموشية العتيقة هنن “الطويفين”…
الطويفين يامرحوم البي أربع خمس بياعين فواكة بيفتحوا أرباعشرين ساعة ليل نهار صيف شتا عيد ماعيد هبسي برابار….بعز دين البرد عندون جبس وبطيخ…هدول الوحيدين اللي كان عندون لبن العصفور..!!
بس هدول كانوا حرمية الفي…بيقطعوا الإيد ومابزفتوا… ومين كانوا زبوناتون مرى عبتتوحم طلع على بالا الجبس بكوينين…!! كم شب أجتون سهرة عغفلة وبدون يتبينوا قدام “المقدم” …!!
على زيق الرصيف بتشتري باقة مضعف بفرنك وكيس ملبس بفرنك وبتعبي إيدتينك جلادين بفرنك ..ماعبتلاقي الدوا اللي بدك ياه بحارتك مالك إلا صيدلية الحكيم أو الدامرجي بمدخل الموشية..!!
جرايد ومجلات من القبوسة الزغيرة من عند ولاد وطفة من “الجماهير” “للهيرالد تربيون” ومن مجلة “الشبكة” و”الموعد” لل “شوت” و”وورلد سوكر”
بدك تغير حجرة قداحتك “الرونسون” هنيك …بدك تعبي قداحتك “الديبون” الغاز الأصلي كمان هنيك على كتف سينما ليلى من عند”بنكوان” وبتشوف إذا منزّل “بايبات” جديدة وبنفس الوقت بتاخدلك شوية بدلات داخلية وجرابات”جوكي”..
لأي ياسيدي وبتشتري علية “خردق” مشان مارتينة صيد العصافير..!! بتسلخ جحش هوا لإيخر التلل بتبشبش عويناتك وبتدرمل لعند الصحاف قدام الإطفائية العتيقة شوية بزريات وبترجع!!!..وقبل ماتفتح كيس البزر بتنط
للرصيف التاني بتسلخ تنتين تلاتة سجق من عند “ماردو” عالواقف وبترجع…
“الموشية العتيقة” مقسومة قسمين باصات بتدخل من طرف باب الفرج على كتف صيدلية الدامرجي وهدول الباصات باب النيرب..السراي..الصالحين…كلاسة …فردوس…جسر الحج…المشهد…سيف الدولة …صلاح الدين..الجامعة ..السبيل ..منتزه السبيل..المحافظة…
والقسم التاني كانت الباصات تجي من طرف مخفر العزيزية على حيط الصيدلية العمالية وتلف من اليسار وترجع… المركز الثقافي قسطاكي حمصي نيال معري رمضانية سليمان الحلبي …وفي من الإطفائية بكمل عالجابرية..وفي بكمل عالميدان وفي بكمل على عين التل وفي بكمل باب الله وفي بكمل على صاخور وطريق الباب وطبعا في على الداهودية “الأشرفية” وفي عالشيخ مقصود…
على حيطان الموشية العتيقة بتقرا إعلانات لحفلات ومباريات ل”ديميس روسوس” و”شارل أزنافور” و “ديربي كاونتي” و”ويست بروميتش آلبيون” و”سبارتاك موسكو” و”الزمالك” و”الأهلي القاهري”… الموشية العتيقة مركز الكون..
