عن الزلغوطة والأمهات .. كتب عبدالكريم بيبي
نحن أمهاتنا بتزلغط أول مرة بينفج أبنا وبتجيب اللي فجو وبتعملون بيض مقلي…نحن أمهاتنا وهي عبتكبّس دكة سنين الولد بترقع زلغوطة بتنسمع من سابع حارة اذا لاقت أبنا منبز سنو، ومنعمل سليقه ومنرش على وجا سكر وقرفة ومدردر وملّبس ومنفرق على أمة لا إله إلا الله…
نحن أمهاتنا بتسلخ زلغوطة قوتا مليون على مقياس ديسيبل لأنو ابن قطاي أو أبو عمر الحكيم أو الصفوري قطشلنا الحشفة، نحن أمهاتنا بترقعنا زلغوطة بتحولنا حول وقت منمسك أول مرة قلم الرصاص ومننبطح عالأرض ومنكتب انشالله هيروغليفي…
نحن أمهاتنا بتنقرنا زلغوطة بتخلينا نرجع أنرييه للكرويتة اللي يادوب خطينا منا لأنو بلشنا ندودي كم خطوة…نحن مننعبط من طي*** على طول نفس وقوة زلغوطة أمهاتنا لأنو اليوم الآستاذ عطانا…مرحى
ونفس الزلغوطة على التحسين والترغيب والتقدير والإمتياز..!! ويايامو على الله يوم الجلااءات…أمهاتنا ونسوانا بالخطبة بتزلغط وبالكتيب بتزلغط وبالطهور بتزلغط وبتنبيز السنين بتزلغط …!!
وبدورة العاروس بتزلغط وبالجلاء بتزلغط وبالتخرج بتزلغط…
عادي مو…إيه يمكن عادي…. بس حدا يقلي في نسوان وأمهات بالعالم أذا استشهد أبنا بتزلغط غير نسوانا وأمهاتنا، عرفتوا مين عشتار وجوليا دومنا وزنوبيا
هدول ناناتي
