“ستوري” لطليقة تامر حسني تثير جدلاً بينهما

أثارت “ستوري” لطليقة الفنان تامر حسني جدلاً بين جمهوره، بعد أن وجهت بسمة بوسيل اتهامات له في الساعات الأخيرة.

وشاركت “بوسيل” مقطع فيديو نشره “حسني” لإحيائه حفل زفاف مديرة أعماله، معلّقة: “حسبي الله ونعم الوكيل فيك يا هالة!”.

ووجهت “بوسيل” لحسني رسالة قالت فيها: “احترام العشرة بيبتدي باحترام مشاعر غيرك.. بالذات لو حد كان سبب رئيسي في خراب بيتك وهدم حياة ولادك”.

بدوره “حسني” علّق على الفيديو الذي نشره عن هالة: “لكل اللي بيسأل عن ايه وجه القرابة بيني وبين العروسة الجميلة دي انا هحكيلكوا”.

“هي اسمها هالة عمر عرفتها كانت بنت من الفانز صغيرة و من المقاتلين والمدافعين عن تامر على الانترنت.. و من كتر دفاعها عني لفتت نظري”.

وأكمل: “مرة رديت عليها شكرتها ولما سافرت اسكندرية في الوقت ده لقيت بنت صغيرة اوي بتعيط وبتجري عليا، فاوقفتلها وفكرتني بنفسها وفضلت تعيط”.

وتابع: “وتقولي احنا معاك ولازم تكمل عشان كنت بتحارب جداً في بداياتي فااتصدمت ان اللي بتقول كده بنت صغيرة والمجهود ده كله اللي عاملاه بنت صغيره عندها 14 سنة”.

“ووقتها كانت السوشيال ميديا لسة بتطلع وكنا في شركتنا بندور على حد يمسكلي السوشيال ميديا لحد ما قولتلهم انا مش عايز شركة كبيرة انا عايز البنت الصغيرة دي هي اللي تمسكها”.

وأضاف: “فضلوا يقنعوني ان كده مش صح ولازم اكتر حد خبره يمسكها وانا قولت لا لازم اكتر حد بيحبني هو اللي يمسكها وانا واثق ان طاقة الحب مفعولها اقوى من طاقة المحترف بلا حب”.

“وعرضت عليها تشتغل معايا و هي في السن ده مصدقتش طبعاً، ومن ساعتها وهي اللي ماسكة كل شغل الميديا الطفلة الشاطرة اللي كبرت دلوقتي قدامكم هالة عمر”.

“اما بقى عريسها العسل ده اسمه عمرو، طلب اديها مني انا عشان والدها ووالدتها توفاهم الله في سنه واحدة رحمهم الله ياريت نفتكرهم ونهديلهم ثواب الدعاء و الفاتحه”.

وختم “حسني”: “من اللحظه دي اتحولت هالة لبنتي الكبيرة بجد اللي بتتجوز دلوقتي قدامي وبسلمها لعريسها بنفسي و بغني في فرحها، معرفتش ارد على كلامك عني في الفرح يا هالة رديت دلوقتي هنا”.

“وربنا يكرمك ويسعدك مع جوزك الجميل المحترم اللي هيكون ضهرك وسندك و يكمل معاكي مشوار حياتك مع اولادكم الجُمال بإذن الله”.

وكانت أعلنت “بوسيل” طلاقها رسميا من “حسني”، حيث كتبت عبر “انستغرام”: “جعلنا بينكم مودة ورحمة، دا كلام ربنا في الزواج والطلاق، لقد تم الطلاق بيني وبين تامر حسني”.

تلفزيون الخبر