رسالة إلى السيد المسؤول عن الفطبول بالبلد

السيد المسؤول الاول والاخير عن الرياضة بالبلد رئيس الاتحاد الرياضي
السيد المسؤول عن الفطبول بالبلد

صرلي يومين تلاتة عمبسمع أنو في ناديين بالدرجة التانية حطولوا صابونة لنادي تالت وزحلقوه …الحقيقة ضل بالي لانو بعرف هيك شغلات مابتصير وخصوصي أنو سعادتكون مابتسمحوا بهيك شغلات… ولايمكن..!!

مالكون بالطويلة قلت إن بعض الظن إثم… واتفرجت عشريط المباراة… الله وكيلكون ولالمحت ولو لمحة وحدة شي ألو علاقة بمس النزاهة.. شغلة أصفى من حليب الام… ولا اللو… بتعرفوا اللو هه ولا اللو…!!!

وبالعلامة سمعت المذيع عبتشكر معلمو أنو خلاه جزء من هالملحمة الشريفة..!!! وكمان سمعت نفس هالمذيع عبقول خلصوا التلات دقايق وخلص صفر الحكم ورغم هيك طيبتكون وأكابريتكون وقلبكون الكبير سمح للحكم بدقيقتين زيادة أجا فيون غولين بس…!!!

ياسيدي أنا شفتلك هدول اللي عبطالعوا هيك اشاعات جماعة الغل والحقد والكره معبي قلوبون وكل هالحركات تغطاية لفشلون…!!!

خدعتكون بالله نكاية بهالسرسرية اللي عبطالعوا عليكون كلام مشكل ملون عاقبون عقاب يطلع من خرجون…!!! بس صعي أنتو قلبكون نقي وطاهر ومابيحمل غل ولا حقد مابتسخوا فيون..!!!

من رحمة الله علينا أنو أنتو مسؤولين بس عن الرياضة اللي سعرا سعر الصرماي العتيقة ماحدا سيأل عنا…!!

أسيادنا دخيل قلبكون بس ماتكونوا انزعجتوا من شوية هالرعاع الصقاقية قليلين الناموس اللي اتهموكون بالباطل أنو أنتوا سهلتوا الموضوع عيني عينك..!!!
والله انتو بتنشربوا مع المي العكرة

الكابتن عبد الكريم بيبي – تلفزيون الخبر