اللي نيزل يقدم لقدام.. بقلم الكابتن عبد الكريم بيبي
مين بيتذكر باص النجدة أبو أنف..!! باص نقل داخلي طلع من الخدمة (مرسيدس) ألو بوز لقدام وبتم البوز حيطين دولاب…
هادا كان تلاقيه مصورخ لنجدة أي باص نقل داخلي معطل وين ماكان… الباصات كانت بهداك الوقت “نيقة” مرسيدس بنز على سن ورمح.. السقف أزرق والدوار سمني… الطلعة من ورا والنزلة من قدام..
درجتين وبتوقف قدام الجابي… الجابي كان شغلة..لبسو متل الطيارين هلق..بدلة كحلي وقميص أبيض عبضوي وكرافيتا كحلي وزرار مدهبة عليها شعار الشركة وقبيعة شي حاشوم وعلى كميمو شرطان مدهبة بتدل على سنين خدمتو وأقدميتو والشوفير شرحو…
اشتهيت مرة أشوف واحد منون مبزبزة دقنو..أبداً دايماً على سنغة عشرة.. الباص من جوه عبيضوي ضوي..نضافة وقطافة وأخو أختو اللي بيشعل سيكارة سيوي عالشرطة العسكرية؟؟..
فوق اللبلور القديمي للباص مكتوب”ممنوع التدخين” مقابيل الجابي مكتوب “مخصص للسيدات” وكمان”لطفاً قدم مكانك للسيدة الواقفة” و”ممنوع مد الرأس واليدين من الشباك” مو النوافذ..!!
الموشية العتقية “المنشية” هي مركز إنطلاق الباصات بكل الإتجاهات.. وكل خط مكتوب على الباص من برا أسم الوجهة ورقم الخط.. وكل خط مقسوم قسمين مشان تحديد سعر التذكرة.. وفي موقف باص منقول عليه عرفاً نص الخط…
يعني إذا طلعت من الموشية باتجاه الأنصاري- المشهد نص الخط بكون المسبح البلدي… الجابي كان بالسليقة قبل مايوصل الباص لكل موقف يصيح بصوت عيلي مشان ينبه الركاب..متحف..موقع..معاوية..اسماعيلية..فيض..مسبح…وهيك لأيخر الخط..
أجرة الباص ألا علاقة بلوين رايح أو وين نيزل..!! بنفس هالباص مثلا أذا رايح لبعد نص الخط بتدفع فرنكين واذا معك هوية فرنك ونص (هوية طالب أو عسكري والطالب أي حدا من صف الأول للجامعة بمافيهم الأساتذة)
إذا لنص الخط وقبل فبتصير فرنك ونص للعادي وفرنك للهوية..!! الجابي كان أخو حفيانة بيعرف الكل لوين قيطعين…ومنو نزل ومنو عبضرب عونطة وبلقطو…أذا طلعت بالباص قبل الساعة سبعة الصبح أسما “عالفرصة” حق البطاقة فرنكين بس هالبطاقة بتخولك أنو تروح وترجع فيا قبل السبعة المسا (تشجيعاً للعمال ولأمة الله!!)
وهالبطاقة بكون مكتوب عليها بخط كبير تاريخ اليوم..إذا مااستخدمتا بنفس اليوم بتحسن تستخدما بذات التاريخ الشهر القادم..!! وهالبطاقة بتصير على أي خط.. واذا كانت مالازمتنا كنا نبيعا بفرنك ويهفوها هف..!!
بالباص كنت تسمع حدا عبقول للجابي (مصلحة) هادا مابيدفع لأنو بشتغل أما بالنقل الداخلي أو شركة الكهربا والمياه..هدول شركة وحدة..!! ومرات تسمع حدا عبقلو (وسام) أي حدا عندو أكتر من تمن ولاد كانت الحكومة تعطيه وسام بحقلو يركب بالباص والطراماي والقطار مجاناً..!!
وكنت مرات تلاقي حدا عبطالع شي بشبه الهوية أسمو (إشتراك) في منو سنوي وفي منو ست تشهر…بخمس وراق بالسنة بتركب بأي باص ولوين ماكنت رايح..والجابي كتير مرات كان يدقق على صورة الأشتراك لأنو في عالم يستخدموا اشتراك الأخ مثلاً…
كتير كتير كتير عيب أنو يبرك شب أو ولد صغير ويكون في مرا واقفة أو رجال ختيار…مرات تاكل زورة ومرات حدا يعيط عليك… الشوفير كان ألو عادة كمان أنو قبل مايوصل عالموقف بخمسين متر يدق على غطا الموتور مرتين تلاتة.
وهي تعني أنو في حدا نيزل ويلاحقها بالتطليع على المريه النصينيه أنو في حدا قرّب..ومرات يعصب ديه يوب..عبتتحنغل..ميشي على بيض…قرب لقدام..
بنص الخط دايماً في (كولبه) يعني براّكة فيا مفتش..قدامو جدول رقم الباص وإينا دورة وإيمت لازم يمر من قدامو واذا الباص مسّبق أو عليه تأخير.. كان في مفتشين جوالين مابتعرف إيمت بيطلعوا ووين…بفتشوا عالسائق أذا متأخر أو العكس.. وبشوفوا بطاقات الركاب.. وياويلو اللي مزعبر..
وقت كتير يصير زحمة الجابي يصيح شيل إيدك من جيبو “دعابة وتنبيه من الحرامية” ..مرات إذا صار سرقة بالباص وحدا ضرب إيدو على عبو ومالاقى الجظدان يصيح انتشلت..الشوفير مع وجو عالمخفر..تسعين بالمية المخفر بيعرف الحرامية..ومرات بتلاقية مزتوت بأرض الباص..
باصاتنا كانوا مرسيدس بنز وعلى خط سليمان الحلبي والهلك كان في “بيرلييه” وكان ألون باب بالنص كانوا كبار أكتر..وبعدين أجت باصات نصر المصريات وبعدو أجو باصات “سافييم” فرنساويات وبعدين فيات إيطالي..
اللي نيزل يقدم لقدام…
الكابتن عبد الكريم بيبي – تلفزيون الخبر
