حملة “فالوجيين” لمساعدة الفقراء في العيد
انتشرت على مواقع التواصل الاجتماعي وفي الشوارع أخبار تروّج للقيام بأعمال خيرية ومساعدة الفقراء قبل أيام من عيد الأضحى، ومن هذه الحملات كانت الحملة التي تقوم بها مجموعة “فالوجيين” ومشروع “اكشن”.
وقال أحد منظمي الحملة عماد عيسى لتلفزيون الخبر “قررنا نعمل شي حتى لو كان بسيط لحتى نرسم ضحكة على وجه طفل أو طفلة أو عامل نظافة أو اي حدا، يمكن حابب بشي عيد من هالاعياد يفرح بقطعة تياب أو بحذاء”.
و أوضح عيسى، أدمن ومؤسس مجموعة “فالوجيين”، أنه “قررنا وضع صناديق بجانب كافيه “اكشن” العائدة ملكيته للصحافية رين الميلع”، مضيفاً “وحبينا نعمل الفكرة بطريقة ماتجرح أي انسان حابب ياخد من الصناديق تياب و كتبنا على كل صندوق مع اللوغويات تبع غروب فالوجيين و مشروع اكشن”.
وبين عيسى أن “الصناديق مقسومين قسمين (صندوق الأبطال) للشباب والصبيان الصغار، و(صندوق الأميرات) يلي هو صندوق للصبايا و و الستات والبنات الصغار”.
وتابع عيسى “الفكرة انو أي حدا بيكون عندو تياب ماعم تجي مقاسو، أو موجودة بالخزانة وماعم يلبسا، أو حذاء قديم شوي عندو، هالشخص بياخد هالأغراض يلي عندو القديمة بشرط أنو تكون غير متضررة و نضيفة و بيحطها بهل صناديق”.
وأكمل عيسى “هون بقا بيجي دور العابرين من الشارع من جانب الصناديق، ونحنا عاطينن حرية أخد الكمية الكافية من القطع يلي بتلزمن أو بتلزم ولادهن عالعيد، ليفرحو هنن وولادن بالعيد ولو بقطة تياب مستعملة استعمال خفيف”.
واشار عيسى إلى أن “عامل النظافة، المتسولين، أطفال الاشارات، الأيتام، العجزة، الفقراء، هنن الفئة المستهدفة أولا من الحملة”، مضيفاً “هنن أهم حدا لازم ياخد من هالصناديق يلي رح تكون مليانة من الأغراض يلي رح ياخدوها شباب غروب “فالوجيين” ويحطوها بهل صناديق و هيك منكون عملنا ولو شي صغير لنرسم ضحكة على وجه طفل حابب يلبس جديد عالعيد أو عامل نظافة حابب يلبس جديد عالعيد”.
يذكر أن مشروع “اكشن” ومجموعة “فالوجيين” يحضرون لإطلاق حملات بعد هذه الحملة، لتقديم مساعدات لا تقتصر فقط على فترة الأعياد، مثل زيارة دار مسنين أو دار أيتام أو يوم ترفيهي لمرضى السرطان، وذلك بحسب عماد عيسى.
