بالحلبي العتيق

تاريخ وسينما وشوية حكي .. بقلم عبد الكريم بيبي

قال أمي رحنا أنا وعماتك فاطمة وبدور عل أساس رايحين نشتري كلفة ورحنا على سينما فؤاد اتفرجنا على فلم صوت الحب لعبد الحليم وصباح ووقت رجعنا بركت بحضن جدك وكريتلو الفلم ” ياغشاش ياكداب يابو دقن عيرة ” !!… معناتا هادا كان أول عهدي بالسينما…!!.

شي تلاتمية أربمية فشخة من بيتنا بكون جوات إينا سينما بدي ياها.. أول فلم بسوريا كان بحلب عام 1908 والمدينة اللي ماكان يتجاوز عدد سكانا شي خمسمية ستمية ألف كان في تسعاوتليتين سينما…

كتير منون فتحوا وسكروا قبل ماأولد وكتير منون تغيرت أساميون من كوزموغراف إلى أمبير إلى روكسي ومن الشرقي إلى الكندي…أعظم ماأنتجته السينما العالمية إلى العربية كان يعرض في حلب والقاهرة ونيويورك في آن معا..

من “ذهب مع الريح” إلى “زوربا” إلى “هاتاري” مروراً ب “هرقل في أرض العجور” وماشيستي” و”المصارعون العشرة” و”المصارعون السبعة” .. و”بوبو” و”الليدي هاميلتون” و”الساقطة” و”القط ذو الأذيال التسعة” ..

بسينما فؤاد شفت نوال ابو الفتوح شخصي وبسينما حلب شفت “دان فاديس” و”يوسف شعبان” شخصي..حضرت إفتتاح سينما أوغاريت وعمري سبعة..!!!

السينما يعني طقس خاص…يعني عائلات…يعني نسوان طيبين على وجون الباجاي ونسوان بالإيشارب ونسوان بالميني جوب…!!! السينما يعني لبس نضيف..!!

بتذكر شلون أبن الصوفي اللي كان من حارتنا ويوقف على باب الدخول لسينما حلب رجع غسان ابن الرمضان لأنو حويجو مأنشحة..!!

السينما يعني زحمة وحجز قبل كم يوم..!! السينما يعني مافي مطارح..!! السينما يعني أبو البيل الحباب..!! السينما يعني هوية بستين قرش واذا مامعك هوية يعني خمساوتمينين قرش..!!

السينما يعني إصحاك بصادرولك التخليطة..”..!! السينما يعني بللورة ياجوز العورة بس مو بكل السيلامات..!! السينما يعني “الفردوس “بربع ويمكن تربح نص دستة كاسات..!! وأفلام عربي متل “رصيف نمرة خمسة” و”حميدو” السينما يعني فاروق بربع “الفاروق” بتدخل صاغ بتطلع مخروق لأنو فيا حبابين ولاد..!!!

السينما بست فرنكات “ليلي” وبسبع فرنكات يعني “روكسي” و “ريو” و”عباسية” و”القاهرة” بخمساوخمسين قرش يعني “رمسيس” و”سورية” بستين قرش يعني سينمات الأكابر وفلم جديد..!!!

السينما يعني يوم التنين من كل أسبوع أفلام جديدة..!! السينما يعني الهزيمة من المدرسة حفلة العشرة الصبح..!!! السينما يعني دموع وأفلام هندي وحليمو…”الزهرة والحجر” و “من أجل أبنائي” و “الخطايا”..!!

السينما يعني رفيقك يقطعلك بطاقة ويقلك وإذا شيفو…!! يعني مابينشاف الفلم مرة تانية…!! السينما يعني اذا الفلم ساعة وتلت يعني قصير واذا تلات ساعات يعني فلم هندي…!!

السينما بالأوبرا يعني “غلاسية” بتنشلف من الصالة للبلكون وبيجي بياخود حقا منك بعد نص ساعة..!! السينما بالفردوس يعني شاي..!! السينما ب”الريو” يعني بيض وصمن…!!

السينما حديث المدينة ..طقم وكرافيتة.. وشرطي يكتبك مخالفة إذا دخنت…!!! السينما جرس طويل أنو بلش الفلم…!!

اليوم عرفت أنو في بلد قرر يسمح بافتتاح سينما…!!! آه يابلد

تلفزيون الخبر

مقالات ذات صلة

زر الذهاب إلى الأعلى