بالحلبي العتيق

بالحلبي العتيق .. عن ايكو وتلاتاوستين ملك حكموا ماري وأغلفة الكتب المدرسية ..

على بعد شي مية وعشرين كيلومتر من دير الزور وشي عشرين كيلو متر من أبو كمال بمنطقة أسما تل الحريري كان حدا عبيحفر قبر قام لاقى تمثال مالو راس…..!!!

هالحكي صرلو شي تسعين سنة… أجى العالم الجليل “آندرية بارو” مع بعثة من متحف اللوفر وضلوا يشتغلوا من سنة الأرباوتليتين للأرباوستين من القرن الماضي…!!! حذروا أش لاقوا…؟؟؟

أعظم مااكتشفته البشرية من فجر التاريخ وحتى الآن…..مملكة ماري… عشرين ألف رقم فخاري مكتوب باللغة الآكادية السامية …تماثيل للملوك وزوجاتون… رسوم هندسية…اختراعات…نظريات بكل العلوم…صناعة وتجارة وموسيقى..

أول مدينة بنيت في حوض الفرات الأوسط بين دجلة والفرات….!!! هادا العالم المدهش اللي قال جملتو الشهيرة ” لكل إنسان متحضر وطنان .. بلده الذي ولد فيه وسورية” ؟؟؟..

ياحدد …ياجوبيتر… ياعشتار…ياالله…. كل التاريخ…كل بدايات البشرية من العصر البرونزي يعني قبل تلاتالاف سنة قبل الميلاد لهلق يعني قبل سيدنا موسى بألف سنة…!! يعني نحن ساميين قبل العر**ت مايزوروا التاريخ..!!!

تلاتاوستين ملك حكموا ماري خربت واتعمرت مرتين.. أعظم ملك حكم ماري لمدة تليتين سنة أسمو “إيكو أو إيكون أو إيغو شاماغدان” …أول من أقام معملا لصناعة العجلات..!! معملا لصناعة القوالب…فضة نحاس ودهب..معملا للصباغة ومعملا للخزف..!!

أقام قنوات الري..جلب الفحم عبر الخابور.. كانت ماري مركز التجارة العالمية وصولا إلى صقلية.. وشرقا حتى الصين وأفغانستان…!! ساوى بين المرأة والرجل في كل شيء ..ووضع أسس التشريع القضائي..!!

المدهش في الأمر أنو “أندرية بارو” عثر على تمثال لهالملك…بعد أربع تالاف وخمسمية سنة طلع حدا من صلبو حط صورتو على كتاب التاريخ للصف العاشر..!!! قامت الحابورة…ماضل كلب من اللي بيكرهوا تاريخ سورية إلا هاجم الصورة….!! منو هادا…شكلو برعب..!! ماضل غير هاد تحطوا صورتو…؟؟

بعد شوي بتعرفوا الحكيه من طقطق للسلام عليكون… من سنتين بعرف أنو صديقي وحبيبي وتوأم روحي المدهش الدكتور نضال الصالح أستاذ مادة النقد الحديث في جامعة حلب ومن ثم دمشق ومدير معهد تعليم العربية لغير الناطقين بها ثم رئيس إتحاد الكتاب العرب قد تم تكليفه للإشراف على تطوير مناهج اللغة العربية…

عملوا شي ببيض الوج لمية سنة واختارت اللجنة صور الأغلفة لأعظم خمس فنانين تشكيليين من سورية..أدهم إسماعيل ولؤي كيالي وفاتح المدرس ونذير نبعة ونسيت الخامس…كمان قامت الحابورة على صورة غلاف العبقري أدهم إسماعيل قال هادا داعشي إخونجي لأنو صورة المرأة على الغلاف تضع الحجاب أو هيك فهموا…

أدهم إسماعيل ولد بانطاكية عاصمة لواء اسكندرون..!! درس بحلب واتخرج من كلية الفنون الجميلة بروما ودرس بجامعة دمشق وكان مستشار وزارة الثقافة بالقاهرة أيام الوحدة..!! أول من أعاد هيبة الخط العربي للفن التشكيلي مع محمود حماد..!!!

النهار اللي نزلوا الكتب تاني يوم صحيفة الشرق الأوسط الوهابية عملت فوتوشب مزور لأغلفة الكتب ولحقتها تاني يوم قناة العربية “الإسرائيلة”

وهجموا الكليب وماضل جحش ماو عرفان وين الله حيطو وبلش القص واللزق والله ينعل اللي بعيدا ومابزيدا….سبع سنين وألف مبخر مابلحق لفسى…!!!!
علي السخام منستاهل…منستاهل منستاهل والله لايشيل الشدة عن قلبون

بقلم الكابتن عبدالكريم بيبي – تلفزيون الخبر

مقالات ذات صلة

إغلاق