بالحلبي العتيق

“المشطفين” .. كتبها الكابتن عبد الكريم بيبي

هدول “المشطفين” بتعرفون مو.. منلاقيون بالموته والعرس ووقت بصير قتيلة او حادث سيارة..مدري منين بينبقوا..!!!

بالموته وقت الروحة عالجبانة بتلاقيه عبوزع المهمات…مامعك سيارة مو…طلاع هون..؟؟.. وبفتحلك باب سيارة حدا مابتعرفو..ويمكن حدا مابتحكي معو..وبالرجعه الكل بنساك.

بالعرس بشخلع جنبك…وبقلب على قفاه بجي ليطب بحضنك…لأ.. وبقومك مشان ترقص..؟؟؟.. اذا شاف حادث بنزل من السرفيس متل الشوحة…أبوْ…رايح الطابون…هادا مابلتقى منو..!! .. عشرين ألف مابتشيلك…خود منو اش مامعو..اذا ساويتو ضبط الشرطة بتساويكون بقرة حلابة…!!

بالملعب بشوف واحد من حارتو بصحلو طلاع في محلات…وقبل مايصل لعندو بدرجتين تلاته.. بصيح لزو عليكون ياشباب وسعوه جنبكون..؟؟
هدول صاروا عالفيسبوك بطجوا لايكات للي عبسبوا الراهبات وللي عبدافعوا عن الراهبات.

وبكتبوا شعر وحكم وأمثال وخواطر…؟؟ عبخطرلي أبق البحصاي وأطالعلون قويطات العجم…؟؟.. حلوا عن سفايتنا مشان ماأطالعلكون شي تاني.

جرب غلاط وقلو إينا هي أطيب جبنة الزاهدة ولا الباقي…!!! وخود من هالجبن العزيزي وسيخ…غلاط وقلو أخدت نص شقة من دكيكين حجيج وطلعت فستق…بكرهك الشقة والمتن ولوح الكتف والضلع والفخد والبسماجكات والتلحيمة وصولا للعصعوص واللية…

الله يرحمك ياجدي عبد الكريم قال على طاق على طنطراق على خاروف محشي عباب صقاق…شدو من دانو بزرب دهانو…شدو من ورا بزرب على قليل الطعمة خرا..

مقالات ذات صلة

زر الذهاب إلى الأعلى