بالحلبي العتيقسوريين عن جد

حلب بعجرا وبجرا .. كتبها عبدالكريم بيبي

يازلمة والله هالمدينة بتحط العقل بالكف….
يعني ليش هاالمدينة من وقت ماوعت البشرية لهلق مليانة أمم عبتجك وبتغلي…
متل جوال الحنطة ملان خيرات.. دهبي عبلالي ملالاه..بلون الشمس بس طرقت فيو

الغمزوي بتهر هالحنطة عالأرض وبتنداس بالصرامي وبس عطست السما مابتلاقي إلا
هالحباي رجعت نتشت وربربت وتعبت لدين ربا وبترجع بتطعمي اللي داسوا..!!

طلاطاعش ألف سنة وماضل ابن مرا إلا وساواها محستو… شي غزو وشي حصار
وشي خراب وتدمير وشي نهب وحرق وقتل وسبي… وجابولنا زعيط ومعيط ونطاط الحيط…

مرة الله يذكرو بالخير الدكتور عزيز اسكندر عبشرحلنا بالجامعة “سبجيكتيف كوراليتيف”
يعني المعادل الموضوعي عند أدب شكسبير…يعني بالمشرمحي أنو كمية الشر مالازم تطغى على كمية الخير مشان يكون في تعادل…!!

يمو على الله…!! معناتا هالنظرية اختراع حلبي…. لأنو بحلب بتلاقي أفهمم وأذكى وأشطر وأشرف تاجر بالعالم وبنفس الوقت وكمان بحلب بتلاقي أعر* وأحقر وأندل وأوطى تاجر بالعالم…

بحلب نحن اللي اخترعنا “التكايا” يعني انت على باب الله بتاكل وبتشرب وبترفس الصفرة بإجرك وبلا منية ويامية السلامة…وبحلب في خلق المصاري طايفة على معلاقا ومابتش* على إيد مجروح..!! وبتلاقيون أبرد من طي* السقا…

بحلب في تجار بحطوا بني “اسرائيل” بجيبون الصغير بالفايظ..!! وبحلب في تجار بدوروا بسراج وفتيلة على الفقرا والمحرومين وبوصلولون اللي فيو النصيب بإيدون….

بحلب في إذان بالسجل العقاري والمواصلات عندون إكس فايف من حر مالون وفي موظفين إذا بترشيون بقصوا إيدك…

في المدينة تاجر ضل اربعين سنة لمات مايقبل يركب مروحة سقفية بالمحل قال لأنو بتأثر عالميزين وهادا حرام…!! وفي سمان بيفتح للولد الصغير كازوزة وبيشربلو منا قبل مايكتلو ياها بالكيس.

بحلب منلاقيلوا للحجي من المعرة بالفيديو وخود على كفريات مابتنزل بقبان أذا قال صرت بسراقب..!! بحلب بتشتري لبن يمجد ربو وبتشتري حليب إيخد كفايتو..!!

بحلب بتشتري جرة غاز ملانة مي…وبحلب بيندق عليك الباب وبقلك قال أبوي حسبنا حسيبكون بمونة الزيت..!!

بحلب في أرمن ومسيحية بصوموا معنا برمضان وقولا واحدا لابدخنوا ولا بياكلوا قدام حدا مسلم.. وفي عالم بتتباهى أنو مفطرة….بحلب في مصور أرمني أبنو أسمو محمد…بحلب بيلعب مايك أوسمانيان وجورج نصري مع الأهلي وفكتور شكور وميخائيل دولتللي مع العربي ورضا الجابري وولاد الهنيدي مع الشبيبة…

المعادل الوضوعي يعني كفتين ميزان ….. بوحدة حلب والتانية العالم…
مشان هيك في حلب مشان يضل في عالم…

مقالات ذات صلة

زر الذهاب إلى الأعلى